【本報訊】有「金句王」之稱的數碼通（315）行政總裁黎大鈞離任前接受訪問，力推「遺孤」手機推廣平台「KISS」，同時不忘「寸嘴」，直斥對手csl.的手機支付服務「拍住賞」「跛腳」，無法支援iPhone用戶。香港電訊（6823，HKT）反擊，稱拍住賞反應熱烈，並再與759阿信屋合作推半價購物優惠。
記者：胡仲邦 石永樂
黎大鈞多次強調，KISS是網上市場推廣銷售平台，手機支付只是最後一個環節，並非主打功能，但所有電訊商用戶均可使用，並同時支援Android手機及iPhone。被問到如何評價拍住賞，他立刻爆發：「我都無咩comment，有咩point啫，一半人用唔到，又要轉SIM卡，又要畀你個台綁住，有咩意思吖？」
希望KISS年底前推出
他多次批評對手無法吸納iPhone用戶，「點可以講佢係行先啫？大佬呀，佢嗰個跛腳㗎！唔該，你唔好同我講笑話啦，I think it's an insult（我認為這是侮辱）！」又認為對方的支付數據無用，「如果只係簡單支付，係無data（數據）可言。嘟，買嘢，哦，知道幾時幾日邊個地方，你買咗60蚊嘢，係咁簡單㗎啦。」
他指出，KISS「一路做過咩嘢，攞過咩嘢，去到畀錢喇，已經係最後。所以出發點，我哋同其他支付系統好唔同。」又指已有幾百名零售商戶參與，希望在年底前推出。
雖然KISS向所有人開放，但要成為用戶，亦須到數碼通門市註冊，惟黎大鈞認為，做法對持卡人有保障，商戶及發卡機構亦可降低壞賬率。
拍住賞夥阿信屋五折購物
黎大鈞力踩拍住賞，香港電訊發言人回應時則強調「事實擺在眼前，拍住賞引起市場的熱烈反應」，又指其技術方便安全。
另外，拍住賞繼續用「零食戰」吸客，再次與759阿信屋合作，本周六於旗下店舖出示會員卡及用拍住賞付款，即可獲半價優惠。
數碼通及香港電訊重點出擊手機推銷平台及手機支付，都反映電訊商開始尋找新業務。事實上，外國大型電訊商已作不同嘗試，例如日本軟銀（SoftBank）早年以風險投資者身份入股互聯網公司，例如入股阿里巴巴成為大股東，及收購手機遊戲《Clash of Clans》開發商Supercell等，均獲得重大回報。