唔知係咪真係俾麒麟撞完之後唔老利？新民黨主席葉劉淑儀呢排負面新聞一單接一單，之前俾《壹週刊》影到佢去江湖大佬晚宴，噚日《壹》仔再揭葉劉助理Eric Chan有偷拍裙底嘅癖好，而如果唔係Eric Chan為貼咗大腸照洩露葉劉私隱而致歉，亦唔會咁惹關注。盛傳葉劉話唔去台灣因為驚被特工裝沖涼呢個藉口，都係呢位Eric Chan「獻計」，政圈奇怪點解一個背景咁複雜嘅人，葉劉可以完全唔知，放咗呢個「炸彈」喺身邊咁耐？
有人扮國安恐嚇《壹》仔
八方聽到江湖傳聞，話說《壹週刊》追查葉劉出席江湖大佬晚宴時，Eric Chan護主心切，主動搵《壹》仔講數，《壹》仔當然唔理佢，但有人發現，點解呢個Eric Chan咁熟口熟面？後嚟有人記得呢個Eric Chan，好似當年一個名為「陳英偉」嘅舊同事，而呢個陳英偉涉嫌加入過一個偷拍群組，有鋪偷拍癮咁款；跟住《壹》仔開始追查Eric Chan同陳英偉係咪同一個人，如果唔係Eric Chan「送上門」，《壹》仔要揭發佢身份都唔係咁易。
而喺報道出街前幾日，《壹》仔副總編輯竟然收到自稱係國安人員嘅WhatsApp短訊，要求放過「葉劉條𡃁仔」，要佢到深圳一談，仲恐嚇「否則會影響閣下與及你部下的日後生活」。八方問過《壹》仔中人，佢話唔信有國安人員為個𡃁仔玩恐嚇，懷疑有人借扮國安靠嚇。
嘩，點解葉劉肯請背景咁複雜嘅人㗎？有人話，呢位Eric Chan好識隱藏自己底細，或者成功瞞天過海。八方好想知Eric Chan偷拍底細通天後，葉劉仲留唔留佢喺身邊？又驚唔驚被偷拍呢？八方噚日搵過葉劉，但佢嘅手提電話飛咗去留言，據知佢離港外遊。有花生友講笑，其實從正面睇，Eric Chan單嘢爆出嚟或者對葉劉係好事，總好過到選舉先爆，否則爆走埋選票！
李八方
mailto:[email protected]
