曼市雙雄開季齊齊兩連勝，英超冠軍帶返去曼市呼聲都好高，其實仲有一單新聞都幾搞笑，紐卡素肥佬班主所開設嘅體育用品專門店，一間位於曼市嘅分店俾賊仔爆格，職員點算損失之下，發現大批曼聯波衫被盜，相反一件曼城球衣都冇損失到，咦，唔通識偷就梗係偷曼聯衫？
講真今時今日足球員除咗好波外，個人形象都幾緊要，靚靚仔仔更加係Bonus，曼聯冇咗萬人迷碧咸、C朗之後，連曾經瀟灑嘅傑斯都退埋休，真係吸引女球迷嘅型男唔多，你唔好同我講貌似史力加嘅朗尼呀。
曼聯今夏用1,270萬鎊簽入意大利右閘達美安，就真係識簽嘞；回顧曼聯右閘代表，加利佬？巴西大細孖？路爾斯華倫西亞？都好難同靚仔拉上關係，偶然客串吓右閘嘅菲爾鍾斯，大家都係仲記得佢個囧樣。達美安擁有拉丁美男嘅輪廓，鼻高高、眉粗粗，笑起上嚟殺死人，加利佬之前喺個人Twitter話自己同達美安差不多英俊，真係好想學神仙B咁講：邊度俊呀。
曼聯食咗三間牌大合約，搵到呢位靚仔幫手賣波衫，市場策略已經贏晒，難得達美安球場上一啲都唔差，論速度，或者唔係尼達利基尼、比利連呢啲其他英超快速右閘個皮，但上腳能力就較高，腳法有保證，暫時可以挑剔係傳中波落點唔係太好，亦時有甩漏，或者等爆炸頭費蘭尼出番嚟，達美安嘅傳中先發揮到真正作用。
文：牽牛