社會議題向來炒唔炒得熱都係睇氣氛，睇吓議員有幾大力、或者有幾得閒，當然仲有幾近選舉啦，政治從來都係咁現實。不過，唔知大家覺唔覺得，樓價升到咁嘅天價，但樓價近幾年都冇成為政治議題，只係平時議員鬧兩咀就當叫做關注咗。
市場上，稱得上中產嘅屋苑、新盤，無論有幾新、幾舊，面積有幾大、個則有幾奇，統統都要過萬蚊一呎。多年前，前特首曾蔭權因為樓價問題、失言而遭萬箭穿心，但今時今日，梁振英、曾俊華都未有因樓價問題而遭窮追不捨，可能因為樓價高已是常態，唔係問題，官員心中當然暗喜唔出聲啦。
睇錯市等如食生菜
查實細心啲就睇到，財爺曾俊華年初公佈財政預算案後，因為公關手段了得，民望節節上升，即使樓價破頂再破頂，曾俊華都冇遭議員不禮貌對待，甚至有泛民議員讚佢係下屆特首人選，但大家都應該知啦，政府嘅辣招未能壓抑樓價，「越出越升」，咁樣情況下，財爺都唔使上身，CY會唔會好羨慕？
而喺全球關注美國下月加唔加息之時，官場耳語話，有財金高層官員認為今年美國一定加息，唔單止一次、仲係加兩次。但呢啲都係評估，有時特區官員睇錯市等如食生菜，大家真係聽完就算，好似政府由2009年開始叫大家小心美國加息，但過去6年，美國一次息都冇加過，難怪有財經分析員講過，政府從來唔識做生意，所以政府話買、市民就應賣；政府話賣，可能要買喎。
花生友
周二、四刊出