【現場直擊】
遠展（035）黃大仙新盤鑽嶺其實是位於鳳凰新邨環鳳街一段斜路之上，距離月前發生奪命大爆炸的車房距離只有幾十米路程，由樓盤實地行落去黃大仙港鐵站，急步行都要超過8分鐘。
與大爆炸車房距離近
樓盤為舊契項目，位於黃大仙環鳳街，距離月前發生奪命大爆炸車房距離只有幾十米路程，而且附近幾乎全為車房，隔籬亦只有一個小公園。
此外，樓盤處於斜路之上，行落斜就無大問題，上斜的話，以近期的酷熱天氣做指標，一定熱到全身濕透，長期行的話等同幫自己「練氣」。由樓盤實地行落去黃大仙港鐵站，沿途經過兩支交通燈，本報記者以略快步伐行落地鐵站，需時8分27秒，若果老人家或者小朋友行，應該會超過10分鐘，而且沿途沒有瓦遮頭，好天曬落雨淋。
如果行路嫌遠，可選擇乘坐專線小巴37M，收費3.8元，由樓盤最近的雙鳳街站到黃大仙鐵路站總站，車程約3分鐘，不過該小巴經常未到該站已經滿座。居住於同區多年的街坊普遍都認為，區內無論是購物交通抑或配套，都算是方便，食肆選擇都算多，而且物價都不算太貴。