NBA雙星奧尼爾同米克米拿齊齊來港，原本噚日約埋一齊殺入尖沙嘴同旺角，宣傳旗下能量飲品品牌；點知朝早行完街嘅奧尼爾竟然甩底，留低米拿單拖落區宣傳。好彩呢位拓荒者後衞都有番咁上下叫座力，去到邊都吸引到大批球迷圍觀，逼爆街頭。
前晚奧尼爾同米拿玩轉灣仔修頓，但聽聞臨尾奧尼爾因為場面混亂，嬲爆爆咁離場；原本噚日要落區做能量飲品嘅生招牌，都臨時甩底，連影都唔見。相反身為大老闆嘅米拿就最勤力，雖然遲到近一粒鐘，到晏晝兩點幾先同藝人方力申現身尖沙嘴碼頭，但烈日當空下都毫無怨言，半個鐘內唔單止大派飲品畀球迷，仲同佢哋又selfie又握手。
之後米拿再殺入旺角波鞋街，一現身除咗有大批球迷埋身，更加有自由行爭住影相，逼到一班記者都幾乎要行出馬路。逗留唔夠半個鐘，米拿完成兩站快閃活動，同球迷影完大合照就極速拉隊走人，正式結束一連四日嘅訪港宣傳活動。
巨無霸偷懶去行街
同一時間，偷懶嘅「巨無霸」奧尼爾喺九龍站附近行完街，晏晝四點就帶埋女友喺酒店出發去機場，飛去南韓繼續亞洲之旅。