久未公開露面嘅南豐話事人陳慧慧噚日全身黑色打扮，set好一頭清爽短髮，成個人顯得格外容光煥發。佢話，今次舉辦fashion創業比賽，係因為覺得香港有好多有才能嘅人，想出錢出力幫吓佢哋，又話雖然紡織業幾乎已喺香港絕迹，但fashion行業會係紡織業嘅進化。
不過，當華華問佢點睇樓市、經濟前景嘅時候，陳慧慧就一律唔肯答，仲將啲問題推晒畀行政總裁梁錦松，即刻為對方戴上高帽，指梁錦松識多啲嘢，佢自己一向只「鍾意隱居」。佢只係輕輕提到，最近電訊盈科（008）前副主席袁天凡以15億元沽出山頂白加道22號獨立屋，佢好多謝袁天凡「托市」咁話。