在中環中心碰到當紮投資銀行業賓架S，他離開舊東家大機構後，正與朋友另組投資公司，紐倫港的投資銀行／證券行高層，皆有此傾向，就是到了人生某一階段，職位非常穩定之後，便靜極思動，懶理現時的高薪厚職，下定決心走出去，與三數位志同道合的行家，合組對沖基金，投資顧問公司，融資顧問，私募基金之類，至於將來是否成功，走出去是否比留在投資銀行更好，那要看命運安排，命中有無貴人扶持，非常重要。
賓架S話新公司未成形之前，已在做緊義工顧問，幫中大師妹籌助一個音樂教育大項目。師妹係音樂人，對音樂就好熟，但因大項目涉及資金籌集，建造改裝策劃，及與政府部門聯絡，師妹無法、無力兼顧，故賓架S為師妹籌謀組織非牟利公司，搵有頭有面人士做董事（當然係對音樂文化也要有熱心之人），最重要嘅，就係訂下籌款策略。賓架S話：「直情好似搞緊start-up，要諗定他日如何上市。」問佢係乜大項目，佢唔願講住，只係話一宣佈就會轟動，令香港在國際音樂文化界增加一份光彩！左丁山追問是否與西九有關，賓架S話唔係，但如果香港冇建設西九文娛藝術區之意圖與政府承諾，呢個項目大概根本起唔到步。
曾蔭權昔日搞西九嘅一個意願，就係將西九搞成紐約百老匯，倫敦West End咁樣差唔多，讓香港呢個國際金融中心唔係俾人一個印象，只係講銀，唔講音樂及舞台文化。退休賓架W係賓架S之大師兄，又有咁啱嘅，佢對歌劇非常有興趣，直接加入Opera Hong Kong，着重推動歌劇文化，前星期打電話嚟叫左丁山留番8月30日晚上，到大會堂音樂廳欣賞莫扎特歌劇《女人皆如此》（Cosi fan tutte），仲驚左丁山冇文化，傳來老友記陳鈞潤（Rupert Chan）之簡評，Rupert係歌劇字典，不止係發燒友，睇佢嘅簡介，一定冇錯，Rupert指《女人皆如此》係莫扎特作曲，Lorenzo da Ponte編劇及作詞，兩人合作嘅三齣歌劇，即《費加羅的婚禮》（1780），《唐喬望尼》（1787），及《女人皆如此》（1790）係三大膾炙人口嘅意大利歌劇，《女人皆如此》雖然劇情犯駁，但三對男女角有二重唱、三重唱至六重唱及獨唱，係難得嘅悅耳動聽好歌好音樂。呢次Opera Hong Kong之演出，由莫華倫監製，六位華裔男女歌手演出，一定要捧場。