唔知讀者有否察覺，今年夏天特別熱？冇錯！中國氣象局公佈，7月全國平均氣溫較常年偏高，較常年同期偏高0.2度，全國共144地方發生極端高溫事件。咁嘅天氣，大家都會多開冷氣，令用電大增。不過，統計局公佈，今年7月內地用電量反而比去年減少2%，豈非怪事！
內地係粗放型經濟，能源效率低，生產過程中的耗電遠高於國際水平。過去幾十年，用電量增幅遠大過GDP增幅。不過，今年情況好反常，上半年用電量增幅只有0.6%，但GDP增幅仲夠膽話有7%，真係搵鬼信咩。
紙始終包唔火，今年夏天特別熱，內地用電量不增反跌，原因只有一個，就係工廠生產極度萎縮。事實上，上半年內地鐵路貨運量跌一成，已經實實在在顯示，經濟唔單冇增長，仲極有可能已陷入衰退。如果阿爺仲話可以保七，除非想當全世界係白癡！
黃尹華