如果有睇過The Matrix，應該記得戲入面有紅藥丸同藍藥丸。食咗藍藥丸，無知生活繼續過；食咗紅藥丸，雖然殘酷現實一籮籮，但可以喺虛擬世界做超人，你都咪話唔爽！
講真嗰句，身處於中國，奇蹟處處，唔講以為自己已經食咗藍藥丸，喺The Matrix入面做Neo！來生要做中國人，體驗「要不是中央政府照顧，你們點知乜嘢係miracle！」
中國五大奇蹟
1.鍊金術師處處
豉油係頭髮造；牛奶係皮鞋帶提煉。唔係鍊金術師嘅思維，巧妙運用等價交換原理將物質轉換，我真係諗唔到有乜人會諗到咁樣去製造食品。
更勁嘅係，當你以為啲電話騙徒係真騙徒時，我頂！原來佢哋都係啲騙徒搵人假扮嘅騙徒。將蠱惑的槍原理加以發揮成一個白癡到加零一嘅騙局，又真係有人信！中國仲唔係鍊金術師嘅搖籃？
2.不死身
The Matrix入面嘅Neo都只係識擋百幾二百粒子彈！但喺中國官方眼中，中國人仲勁到識得擋爆炸！泰國四面佛嘅炸彈，屬3公斤黃色炸藥，至少超過20人死亡，逾100人受傷。天津爆炸力度，相當以噸計嘅炸藥，仲勁到衞星都影到！但至今官方死亡數字係話逾百人。
仲有天津爆炸同日，遼寧鍋爐廠爆炸，之後又有浙江大橋冧、東莞路陷。呢啲如果係外國發生，一定大肆報道！但你問問我們的祖國同胞們，又有多少人知道？證明中國人見慣大場面，所以咪話外國人廢囉！
至於我哋班香港人仲廢，飲多少少鉛，就嘈生晒。但大家都知，元素表未食勻嘅，都唔好叫自己做中國人，中國人早已練成百毒不侵。
3.中國的太陽比山埃更毒
比堅尼大家就見得多，面堅尼就真係大媽exclusive！冇㗎，你怕曬，都會搽防曬，大媽比你更怕曬，佢咪着（戴？笠？應該咩動詞先啱？）面堅尼囉！留意番，李克強同班領導上天津災場考察，係口罩都唔使用㗎！中國太陽比山埃更毒！
4.中國有平行時空
國產親軍方電影《開羅宣言》，竟然PS走蔣介石，換咗做毛澤東！歷史從此改寫？
想當日中國股市暴跌之時，大家都股災前股災後，但當時份份報紙都話中國牛市未完！
除咗平衡時空論，我真係解釋唔到？
5.催眠術
你：央媽央媽，央你條命！亂咁催谷股市，累我輸錢。
央媽：咁我有冇救市呀？
你：咁叫有？
央媽：咁你要記住，他日發生乜事都好，事實係我真係救過你。
千頌C
http://fb.com/winbigwok
本欄隔周三刊出