馬來西亞人氣插畫師Pocotee，之前幫過《12金鴨》、《破風》等電影畫過插畫，將電影人物畫成卡通樣。Pocotee近排嚟到香港，姜皓文（黑仔）同衛詩雅日前去咗觀塘探佢，Pocotee即席揮毫，只係用咗5分鐘就畫咗個Q版衛詩雅，黑仔亦得到一件Q版肖像衫。Pocotee又畫咗幅畫送畀《蘋果日報》，四周仲附送Q版嘅張學友、吳君如、古天樂同周杰倫，佢最希望將來可以同偶像周杰倫合作。
衛詩雅偷畫雞蛋
Pocotee話自細就鍾意畫畫，3歲已經拎住支筆畫公仔：「大個有讀藝術學院學畫畫，我最鍾意將人物卡通化。」衛詩雅話自己係Pocotee嘅fans，仲話自己有畫畫天份：「我梗係覺得自己有，細個試過拎媽咪啲雞蛋嚟畫，畫完放番入雪櫃，結果畀佢鬧咗好耐。」 姜皓文話之前《12金鴨》宣傳認識Pocotee：「我好鍾意自己個樣變成漫畫角色，佢達成咗我願望，我平時覺得自己個樣兇神惡煞，估唔到畫出嚟咁靚。」
撰文：馮仁昭