都說「成功需父幹」，內地男裝產銷商虎都（2399）噚日公佈，現任總經理郭漢鋒升做行政總裁（CEO），即日生效。呢類升職通告確係閒過立秋，特別之處，係呢位郭漢鋒今年只得25歲，而且係公司太子爺，所以咁後生就可以成為一間上市公司嘅CEO囉。
虎都其實屬於典型家族企業，董事局內三位執行董事，父子二人已經佔咗兩席，59歲創辦人郭建新今次就係唔做CEO，交畀阿仔做，自己只係保留主席一職。
郭漢鋒喺公司工作幾年，佢2009年自上海華東師範大學取得工商管理畢業證書，2012年出任虎都總經理，主要負責公司日常營運同埋整體管理。家陣好多人廿幾歲都未有目標，郭生就已經係CEO，責任重大，不過唔知小股東對佢有幾大信心呢？