男女一向不公平；做女人當然着數啲！尤其是靚女。試諗吓：如果俾摩佬鬧鬼的軍醫唔係靚女伊娃，而係一個麻甩佬，會唔會有咁多fans空群而出為「他」抱不平？不過摩佬一向足智多謀，由對史雲斯時開始，我已斷定佢唔係失控發嬲，而係玩緊計謀！結果，2:2賽和後，全周新聞圍繞摩佬同伊娃；衞冕隊首周失分、泰拔高圖爾斯領紅等幾乎變晒配菜。摩佬再次示範如何轉移視線、自己做箭靶來代替球員承受壓力。
不過，摩佬確越來越神通廣大，已達難以分辨究竟玩弄計謀、定係玩弄自己嘅境界。對曼城一戰竟然真係要伊娃缺席，敗筆是也！君不見車仔眾將喺伊娃缺席下，士氣已比平時低落？觀乎上半場尾段，加利卡希爾慘遭自己友打爆鼻、迪亞高哥斯達又被撞爆頭，本已夠慘；二人接受替工軍醫治理時，更額外流露一份無奈：「難得見紅，點解唔係伊娃照顧我？」最無面，係同時傷兩個，竟然唔夠人手處理，要勞煩曼城軍醫仗義相助！伊娃喺電視睇到，仲唔笑出聲？呢個故事教訓摩佬：玩心理戰可以；但得罪女人？後果會好嚴重！
其實每次車仔敗陣，我都期待摩佬賽後又有何新招？佢試過怪球場燈光太暗、主場球迷太靜同埋客場草地太差……今次連伊娃也用埋，仍然大敗予曼城0:3。賽後摩佬冇再語出驚人，或者佢都知道，要專心處理今次出閘脫腳危機。
方栢翹
now足球評述員