港視倒數第三套劇集《三面形醫》昨日播映大結局，雖然該劇收視回升，但仍扭不轉目前的形勢，不過一班台前幕後仍努力宣傳，前晚在灣仔舉行一場結局優先首映，林文龍、艾威和姜麗文等出席，老闆王維基亦現身支持。
王維基受訪時被問到會否拍劇？他說：「要等法庭判決，𠵱家等緊移動電視牌照嘅司法覆核，有判決後先可以決定再拍。」直到活動尾聲，王維基在台上有感而發哽咽說：「你問我會唔會再開第二季同第三季？我諗現實係殘酷，但香港係需要自己嘅電影，香港電影同其他地方唔同，唔拍電視劇唔代表我唔拍電影，如果唔係我再用4億去起將軍澳嘅廠房，係唔可以做物流，只係可以用嚟拍嘢。」
艾威病妻中西合醫
早前艾威透露用過百萬積蓄為太太醫病，問太太現時情況？他說：「大步檻過，西醫方面只可做開刀消炎，𠵱家再靠中醫調理。」問經濟方面，他說：「都冇問題，收到好多朋友嘅電話，有啲係幾十年冇見嘅朋友，好感動。」至於林文龍透露囡囡亦有捧場，笑說：「我噚晚（大前晚）返到屋企，佢就同我講：『卓天楠，你同我企喺度。』其實嗰場戲係第一集，所以真係好危險，小朋友真係唔可以睇咁多電視。」會否讓囡囡入行？他說：「大個就讀好書先啦，最緊要有一個健康快樂嘅童年。」此外，問姜麗文與鄭俊弘的關係時，她眼濕濕說：「我哋分開咗好耐，都有年幾。」
採訪、攝影：黃曉妍