𠵱家巴塞隆拿條防線，丹尼爾、馬菲奧、馬斯巴查個個都係計時炸彈，係碧基最穩陣；但喺嚟緊季初，碧基可能長期缺陣！周一嘅西超盃次回合，巴塞同畢爾包踢成1:1，總比數輸1:5，中堅碧基仲衰多口鬧旁證被罰紅牌，西甲開「咧」戰肯定唔使預佢之餘，最嚴重要停賽12場！
首回合作客被畢爾包炒四蛋，美斯今場喺43分鐘幫巴塞先入一球，總比數追近至1:4。畢包門將伊拉素斯失波之後，即刻抱實個波拖時間，趴喺網入面郁都唔郁，雙方球員衝突，最後伊拉素斯都拖咗成分鐘，仲搞到巴塞嘅柏度洛迪古斯拎黃牌。換邊後，就輪到碧基沉唔住氣。56分鐘，畢包嘅阿度里斯單刀埋門被撲出，碧基向旁證投訴，話呢球明明越位在先。碧基仲爆晒粗，問候埋旁證屋企人，結果碧基就被罰紅牌。
畢爾包31年首冠
巴塞唔單止追唔番，仲被阿度里斯喺74分鐘入波，雖然畢包臨尾都有球員被逐，但都守住1:1完場；畢包兩回合以5:1大勝巴塞，打破球會31年來嘅錦標荒。巴塞就傷嘞，碧基直接領紅，嚟緊禮拜日西甲開「咧」戰肯定停賽，對手咁啱又係畢爾包，真係冤家路窄。外國傳媒指，鬧球證喺西班牙係好嚴重，碧基好大機會被秋後算賬，被罰停賽4至12場。若果停四場的話，碧基就冇辦法喺九月初鬥馬德里體育會，若果黑仔到停12場的話，就連對皇家馬德里嘅國家打吡都踢唔到，但我求大俠估計唔會罰太重嘅。
巴塞教練安歷基話碧基被逐嗰一刻，就知道冇可能反勝，「碧基被罰紅牌，好不幸。當我哋踢少一個，比賽基本上已經結束。」安帥唔評論球證判決。恩尼斯達就話，巴塞唔會就咁頹落嚟，會全力爭取年底嘅世冠盃。
