泰國曼谷市中心接連兩天發生爆炸，眾藝人紛紛向死傷者祝福。黃曉明和陳妍希更於微博轉發泰國醫院需要中國繙譯的提示，以及廣傳中國駐泰大使館等緊急電話號碼，各盡一點綿力。
古天樂：暫時冇工作要去曼谷，聽到消息好震驚，喺個鬧市發生，唔知講乜好，個地方仲成日去，感覺好危險。自己間中有去拜四面佛，希望當地盡快捉拿兇徒。
陳妍希微博寫道：祈福大家平安！
鄭融：我有睇到濺血嘅相，都唔知可以講乜。近日發生太多事，又地陷、爆炸、山埃，希望世界可以多啲平安，平時自己去泰國都唔會去事發地方，我去旅行主要係陽光海灘。
胡琳：今年冇去泰國，以前差不多年年都去，噚晚知道件事即刻返屋企睇新聞。出事現場去過一次，今次真係無妄之災，希望死傷者安息同康復。
李蘊微博寫道：世界很殘酷，我們為受難者祈禱，然後好好珍惜每一天，因為我們也不知道意外和明天哪個先來，黑暗的月份，請你過快點，不要再傷害任何人和心，拜託。
劉心悠：我都有去曼谷拍廣告，有去過四面佛，𠵱家旅遊旺季，出外玩會買保險，出事都有保障。
石詠莉：我本身如果唔係出碟，真係諗住去。我見到咁，覺得好心痛，唔知幾時邊一刻，我哋世界變到咁，好彩自己冇去，惟有睇吓點籌集身邊朋友捐啲物資幫到呢啲人，希望唔好再有呢啲事發生。
FFx：有朋友去咗泰國玩，早幾日返咗嚟，真係好好彩。睇到新聞見到咁多死傷，個心好痛好難過，之後去泰國嘅人都要小心啲，短期內我哋唔會去，因為好多工作，未必放到假。
李曼筠：我屋企人啱啱去完芭堤雅、曼谷返嚟兩日就爆炸，真係好好彩好緊張，我哋冇親戚喺泰國，不過去得旅行，主要旅遊景點、四面佛呢啲地方一定會去。