日劇《沒有家的女孩》主角安達祐實，由當年嘅天才童星變成露點脫星，加入藝能界呢個大染缸好多好多年，佢經歷結婚、生女、離婚、再婚，上年喺大膽情慾古裝電影《花宵道中》入面扮演苦命花魁，超激場面連場，令安達祐實終於人氣稍作回升。
33歲嘅安達祐實細細個已經被貪錢星媽安達有里視為搖錢樹，當佢事業開始走下坡，安達有里決定以熟女姿態加入AV界，當安達祐實同前夫井戶田潤離婚，佢老母有里擔起湊孫責任，但被阿女發現經常帶後生仔返家開餐，令安達母女關係決裂，幾乎搞到要脫離母女關係咁滯！
不過上年同攝影師桑島智輝再婚嘅安達祐實，今年終於母女關係好轉，上月初仲一家人食飯，呢兩個月不時上載兩母女合照，一時食鮑魚，一時又歎燒海鮮。噚日，安達祐實亦公開現任老公同囡囡三人行合照，當然唔少得月底滿58歲嘅安達有里，可見佢已原諒貪錢阿媽，連寫blog都經常晒溫馨家庭照。