阿爺上星期忽然將人民幣貶值，持有大量人仔嘅人，唔少即刻喊咁口，I.T（999）仲嗱嗱聲將一筆大額人仔兌換番做港元，搞到損手6,000萬元。但所謂同人唔同命，領匯（823）就喺呢件事入面成為受惠者嘞。
話說領匯上月落實向「上海姑爺」旗下瑞安房地產（272），買入上海企業天地1號與2號兩幢甲級寫字樓，作價66億元人仔（82.6億港元），呢個作價冇乜溢價，領匯已經算係執到筍貨。
誰不知阿爺上星期令人仔貶值，令領匯可以再慳多少少。領匯行使買賣協議所訂嘅權利，上星期五通知瑞房，將成交日期延至本月31日，85%尾數（大約56.3億元人仔）將會按付款日前嘅兌換率去畀。人仔兌港元上周至今貶值3.6%，粗略計算，呢筆尾數，領匯可以畀少2.5億港元。
領匯行政總裁王國龍做會計出身，又做過投行，呢單刁真係俾佢計到盡了。