地球好危險，「那東西可能在附近」，仲可能喺中環！好在，香港仲有Iron Man。（唔通靠CY咩）
Sorry，費清唔係short咗，只係想介紹番香港迪士尼樂園新公布，「鐵甲奇俠」主題區嘅遊戲「鐵甲奇俠飛行之旅」(Iron Man Experience)。美國舉行嘅迪士尼D23博覽會，介紹呢個遊戲時，播出一齣動畫宣傳片，見到Iron Man Tony Stark嚟咗中環街頭，突然外星戰機嘭一聲降落，兩個互相攻擊，打到地下都穿，最後梗係好老土咁又係Iron Man贏啦。套片仲介紹Iron Man嘅STARK INDUSTRIES公司仲搬咗去西九發展區，仲係最高果幢大廈。(貫徹Tony Stark浮誇性格。)
香港迪士尼樂園話，鐵甲奇俠飛行之旅工程已經完成平頂，整個項目明年底開幕。大家可以坐喺飛船，由Tony Stark帶領由香港迪士尼樂園出發，飛越維港上空，喺港島主要街道與敵人打餐飽。呢個除咗係迪士尼首個以Marvel為主題項目，亦係初次以香港大都會為故事背景嘅遊樂設施。
美國攝製隊之前已經嚟咗香港取景，為遊樂設施拍攝唔同地標式街景，到時仲會有以Marvel為主題嘅商店，賓客亦有機會同主角「鐵甲奇俠」合照。
博覽會另一個焦點係，Marvel靈魂人物、美國漫畫教父Stan Lee現身介紹Iron Man設施，希望到時佢可以親身嚟香港啦。
記者會youtube片段
https://www.youtube.com/watch?v=3-ElnRfTNq4&feature=youtu.be
費清＃要生計，也要生