【本報訊】電話騙案日日新鮮日日甘，雖然電話騙案新聞幾乎日日都有，但仍然有不少人中招。
城市大學犯罪學家黎定基表示，騙徒手法轉趨科技化，例如利用app偽冒真的來電顯示行騙，再用真人對話順藤摸瓜捉心理，「你回覆電話錄音後，對方用真人去聽，去探討你口氣，用語帶恐嚇言語，睇吓你究竟驚唔驚，有冇猶豫，你一猶豫就知道你有嘢，可以打蛇隨棍上，同埋佢可以用配角去做言語上恐嚇，令你產生恐懼、產生不安，而你就會去畀錢」。
黎續稱，騙徒手法專業，大都能從聲音中快速辨悉性格心理，「多數人聲音都可以分辨出你邊個，年紀幾多歲、你生活經驗係點，你係咪一個好騰雞嘅人，你口窒窒佢已經知道你係唔夠信心啦」。再者，大部份電話騙徒都有組織性，相互間反覆經過多次角色扮演，從而對答如流，易令一般市民無從招架。
他建議一旦遇上懷疑電話騙徒，應保持存疑態度，反問對方姓名、電話號碼及所屬單位名稱，再作求證，切忌心急，「我成日話急嘅人係身有屎，你咁快去深圳匯錢畀人，係咪自己本身同大陸有啲嘢先，摸清自己個底，同喺大陸有冇試過用啲香港認為越軌方法去處理一啲事情，如果有，你會心虛」。
對於近日電話騙案猖狂，有市民洪先生表示從未收過相關電話，但一旦收到，就「會同對方玩吓，反正自己冇錢畀人呃，咪玩吓囉」。不過，黎定基則奉勸市民別抱著「玩番佢轉頭」的心態，因為萬一激怒對方，或會有報復行為，無謂跟對方糾纏，應盡快掛斷電話。