創興銀行（1111）董事總經理梁高美懿潮戴智能手帶！都市人越來越注重健康，但又冇乜時間認真做運動，近年就興起戴智能手帶，戴住佢就可以記錄步數，每日睇住自己行咗幾多步，行得多嘅話，感覺似係活動多咗，感覺良好咁話。
62歲嘅梁高美懿噚日一身套裝主持創興業績會，手上戴住一條唔多配襯、但係夠晒潮嘅智能手帶。驟眼睇，呢條應該係小米手環，香港賣99蚊，主要功能係記錄步行距離、步數同埋睡眠時間。
喺鬧鐘響之前半粒鐘，呢條手帶仲會輕微震動，令使用者由深層睡眠狀態，調整到淺層睡眠，避免由深層睡眠期間直接俾鬧鐘吵醒，搞到好似未瞓過咁。梁高美懿工作繁重，可能就要利用呢條手帶改善睡眠質素，兼且提醒自己行多幾步嘞。