《蘋果》報道，城規會去年底批准喺上水起瀝青廠，官員引述「上水區鄉事委員會主席」支持。貴為主席嘅侯志強（圖）主動搵八方嚴正澄清，話佢從來冇力撐項目。
「你信政府？」
根據當日城規會嘅會議錄音，官員係引述「北區政務專員」再引述「上水區鄉事委員會主席」支持申請，但就冇講到「侯志強」個大名。
侯志強噚日打咗幾次電話畀八方，好勞氣咁話佢記憶中完全冇就此事開過會，至於有無傳閱過文件，佢話最多可能填過無意見，但「力撐」就絕無其事，重申自己對厭惡性建設就一定反對。佢仲鬧鬼八方，聽完錄音唔搵佢求證，「你信政府？你都知道，大佬，唔好講政府，我哋特首講嘢都有藝術㗎，大佬，你唔能夠將政府講嘢屈落我身上」。