唔少人迷茫時走去求神問卜，證監會主席唐家成就選擇去中環舊中銀大廈頂樓嘅中國會食飯，事關中國會有個習慣，客人臨走前，會送上幸運曲奇。唐家成每次打開藏於裏面嘅字條，巧合地都能夠應對當時嘅心境，奇妙得很。
唐家成2011年退休，離開畢馬威，結束37年會計生涯，佢當時接受訪問時說得瀟灑，話「退休就係退休」。今日再講起，原來佢退休前內心忐忑不安，始終係工作超過30年，當年仲只係56歲，忽然早上起床唔使返工，佢都唔知自己習唔習慣。
就喺呢個時候，佢跟朋友喺中國會食晏，臨走前收到幸運曲奇，一打開，裏面紙條寫住「你最好的日子還未到來」，就係呢張紙條令佢放下心頭大石，情況就好似睇相佬話你未來幾十年過得仲好過𠵱家喎。
紙條內容亦相當準確，佢退休後，隨即獲委任為英基主席，翌年又先後獲委任為體育學院與證監會主席，涉獵教育、體育與證券市場三大範疇，單係開會都令佢忙得不可開交，日子過得更充實，雖然佢今年退任英基主席，但體院與證監職務仍極具挑戰性。
幸運曲奇嘅預言咁準，佢𠵱家仲張呢張紙條收喺銀包做紀念㖭呀。
記者：高淑嫻