長實（1113）新盤收樓一向不乏驚嚇場面，今年入伙新盤，如荃灣昇柏山驚現「偷窺門」，同區環宇海灣更附送「F1賽道」欣賞高速天橋上飛車。
於今年入伙的昇柏山，有高層單位的客廁選用了「偷窺門」，即是門頁中間兩塊木隔板，徒手可以拉開，完全窺探到廁所的內櫳。至於同區嘈吵程度猶如「F1賽道」、緊貼高速公路的環宇海灣，超出環保署標準，部份時段更飆至88分貝，隨時搞到住戶神經衰弱。
標榜成豪宅的北角DIVA，浴室坐廁裝得鬆，坐上去就會「郁一郁」，隨時會爆，名副其實為搖擺廁所。而大埔嵐山一期，不足200呎的劏房都最少搵到五處空心磚，買到都心酸。
長實樓盤有特大窗台就眾所周知，一直為賣樓「特色」，連近期集團旗下有董事級人馬推售同系將軍澳峻瀅II時強調「窗台是發展商送的糖，甚至是高麗參」，以此推算，日前記者檢驗的深水埗丰滙3房單位的主人房，連同工人房一共有4個窗台，即係請買家食4次糖；主人房的窗台逾12呎，足足瞓到兩個6呎高的記者，加埋一個曬衫都未必夠位的露台仔，瞓落去，似鐵板燒囉！