歐洲足球聯賽球季已經開鑼，香港球迷仍然最有興趣睇英超，歐洲四大聯賽之中，德甲拜仁慕尼黑永遠一枝獨秀，以本傷人，邊隊有力威脅佢，第二季佢就立即撬走對手主力球星，例如多蒙特嘅葛蒂斯與利雲度斯基，以求獨霸，搞搞吓，德甲就只得拜仁一隊獨大，難尋對手，令聯賽毫無競爭性。
意甲就反映意大利經濟不景，大球會無力搜購世界一流球星，連米蘭雙雄都沒落埋，祖雲達斯變成意大利版本嘅拜仁慕尼黑，聯賽幾乏味。西甲呢，皇馬與巴塞遙遙領先，餘子碌碌，馬體會間中有威脅，但其他球隊就唔會引起世界球迷嘅大興趣。
英超由於制度得宜，二十隊嘅電視分紅十分可觀，加上入場球迷眾多，球會收入不俗，於是除咗所謂Big Six（六大）之外，其餘十四隊嘅實力十分平均，即使面對六大，都未必輸實，譬如第一周上屆冠軍車路士主場面對史雲斯，就踢得好辛苦，被逼和二比二，阿仙奴輸俾韋斯咸零比二，曼聯靠烏龍球贏熱刺一比零，英超強隊對弱隊未必贏梗，爭標六大球隊之中，又有四大至五大爭餐死，車路士、曼城、阿仙奴、利物浦等對賽，互有勝負，只係熱刺稍為遜色。
故此咯喎，每年英超爭冠軍，打甩髀，下游隊伍之護級戰，又係頭崩額裂，咁至吸引全世界球迷收睇英超直播。今季中國與英超闊別十三年後加入轉播，中央電視台每星期直播一場，加埋其他電視台及四大網台，全季共播380場。點解咁勁？因為習近平鍾意，中央政策係發展足球，爭取未來主辦世界盃吖嘛。咁就益晒英超兼外圍佬，蘋果日報（八月九日）報導話，本港球評人（講波佬）到廣州搵銀，除講波外，復在網上提供貼士，講貼士做乜？要講埋貼士，自不然係廣大球迷想賭波啦，但在中國下注賭波，幾時話過係合法㗎？甚麼機構開賭波盤呀？諗一諗就知係外圍佬及非法賭波網，或到境外下注（如直布羅陀賭波網），香港馬會亦可能因此見到賭波投注額上升，不排除有「人頭戶口」接下注碼後到馬會戶口平盤，就好似目前賽馬投注見到有越洲飛彈襲港，大幅度推低某隻馬嘅獨贏賠率咁樣。無論如何，今季中國轉播英超，賭波投注額必然大升，內地有辦法之人收錢收到笑！