要量度颱風嘅精確數據，天文台員工原來「上天又下海」。天文台2011年起同飛行服務隊合作，喺熱帶氣旋接近香港時，派出裝上氣象數據量度系統嘅定翼飛機，飛近南海北部嘅風暴中心，研究風暴嘅強度同風力分佈，天文台人員更加喺情況許可下，隨同飛行服務隊出發，穿越颱風抵達風眼，現場收集數據作實時分析。
收集颱風數據
天文台科學助理梁桂江參與收集颱風數據已經有5、6年，佢接受政府新聞網訪問時憶述，颱風蓮花上月接近香港時，佢隨飛機飛到風眼，近距離感受颱風威力，話當時飛機震得好厲害，雖然戴咗安全帶，「但仍感到快要被拋離座位似的」。飛行服務隊機長鄺志淇就話，平日執勤時會避開天氣惡劣區域，但觀測天氣嘅工作就相反，要往壞天氣嘅區域鑽。
而颱風喺海上形成，所以了解海洋情況都係預測風暴嘅基本步，由於大海難以設置固定的氣象站，天文台亦喺南海展開志願觀測船舶計劃，同遠洋輪船公司合作，喺遠洋輪船上安裝儀器，沿途記錄濕度、溫度同氣壓等資料。