當人仔定存都可以由低風險投資變成中高風險投資後，無論大家信奉「別把雞蛋放入同一籃子裏」抑或「把雞蛋放進不同籃子裏」，經歷A股大跌同人民幣滙價急挫嘅血的洗禮後，總之就不要將錢掉進共產黨的袋裏去。
如今最怕共產黨的人不是港人，很大機會是內地富裕人民。面對人仔貶值，加速內地富戶資產重新配置，特別係提高海外資產分佈，不想眼睜睜望着自己嘅積蓄為人仔國際化而包底。有大行分析估計去年第三季至今年第二季之間，已有2,350億美元嘅熱錢流出，料熱錢外流受人仔貶值而加劇。
呢筆折合有1.8萬億港紙嘅熱錢為求避險，出路多數係買磚頭或換美金。持有資金本不多嘅民眾，會喺內地銀行或者黑市換美金。內地人熱捧嘅海外樓市澳洲，有當地地產商認為今次人仔貶值係好消息。以貿易加權滙率計，澳元兌美元由2013年中高位累跌近兩成。澳元轉弱，人民幣兌每澳元過去12個月來升幅接近三成，即係上年8月強國人揸1蚊人仔可換到17澳仙，今個月就換到21澳仙。人民幣兌美元滙價上個星期五跌勢喘定，但澳洲地產商仍然樂觀，估內地富戶未必去美國投資物業，因為人仔兌美元低水令投資成本增高，仲未計蝕滙水嘅風險，識揀都會去澳洲買樓先保值。
C+B
本欄逢周一刊出