【鉛水恐慌】
【本報訊】公屋鉛水源頭未明，最先揭發鉛水超標的九龍灣啟晴邨，由天台水箱接駁水喉到各大廈每層樓的臨時供水系統昨早啟用。但有居民取水時發現，食水呈泥黃色及奶白色，狠批政府及總承建商不負責任，「特登整條喉啲水都係唔用得，咁嘅色點敢飲」，要求盡快安裝濾水器。
喉管用組件固定
「鉛爆」起源地啟晴邨，總承建商中國建築終完成臨時供水系統，由大廈天台水箱經窗口，直接駁通啟晴邨6座大廈每層樓，喉管不再用燒焊接駁，而是用組件固定，每層樓都有3個水龍頭。有關部門已為系統全面消毒及抽水辦化驗，確保水質達標。不過，臨時供水系統雖已啟用，但供水時間只由上午7時到晚上9時，若居民想於其他時間取水，就要繼續到地下街喉樓下「輪水」。
居民方小姐指昨早到臨時供水系統取水，「一開喉第一桶水就係泥黃色，之後裝咗兩、三桶都係奶白色，真係唔敢用。呢啲水洗手都唔敢用啦」。
■記者譚靜雯