般含道石牆樹被漏夜斬殺後，話咁快就立即安放了一個「不能避雨亭」，為區內居民扮提供社區設施，原來又係建制派區議員陳捷貴「成功爭取」項目。我有理由懷疑當日有建制派議員向政府投訴石牆樹有危險，政府先至會立即行動漏夜斬樹，否則如何解釋鬼祟斬樹行動前民政署官員只致電知會兩位建制派議員包括陳捷貴仁兄，是否代表呢兩位議員為此「背書」呢？公務員一貫作風是少做少錯、唔做唔錯，如此迅速突擊行動，如果冇建制派支持，又點會做呢？尤其形迹可疑是兩個問責局，包括發展局及民政局都銷聲匿迹，任由樹木辦、土力工程署、路政署公務員受靶，一如當初鉛水事件。
建制派區議員為咗政績工程可以去到好盡，今年春天黃大仙區議會內，便有建制派議員指摘紅棉樹開花，飛絮令居民敏感而建議閹樹，問你死未？未到選舉期，公務員明知建議低B兼白癡，當笑話一則，但選舉期近，要民政總署協調各執行部門幫建制派「創造」大小政績工程，由689、林鄭到劉華一條鞭直落監督執行，邊個敢hea做頂撞，就要看看鄧國威人辦，於是全港將會出現打住為區內居民成功爭取的建制派候選人政績工程，投訴樹木危害居民乃其「成功爭取」套餐A，所以好快坪洲又出現斬樹政績。至於「不能避雨亭」，乃套餐B，為配合建制派選情的助選工具。
套餐C則是由林鄭領頭之全港無厘頭清潔行動，為配合區選，由林鄭率領一眾官員及建制派區議員，以公帑去助選，大家一齊做show出鏡，又多一項「成功爭取」。公共資源向政黨傾斜，大家心知肚明，但都唔好做到咁明目張膽，當市民係盲聾又且啞。而更令人憤怒的係有組織種票行為，上屆傳媒查種票，揭露美孚一屋多姓多票，警方事後採取行動拉人，但最後甩身，今屆種票者應該更醒目，鑽研灰色地帶，登記在酒店地址，至於整間老人院被登記為選民，早已實行多年，今年大增年老選民，香港人心知肚明。選管會放軟手腳把關不力，間接鼓勵種票幕後指揮放心做，香港廉潔選舉，早已經得個假殼。
雨傘運動後，年輕人一股熱情投身區選，將會面對重重困難，尤其是選舉中行政中立成疑，689為求連任將全力製造建制派大勝賽果，以示雨傘運動不得民心。八九年六四後，學運社運人士投身區選大獲全勝，九一直選再下一城，奠定泛民政治版圖。九七後建制派在充沛資源下，而逐步蠶食區議會，全部佔過半數，連多年由民主派過半數的葵青及深水埗也攻陷。
今明兩年選舉，無論地區民政處工作，到選區劃界、票站分配、選民名冊審核，泛民要打醒十二分精神，但可惜佢哋𠵱家仲霎吓霎吓，個個放暑假，看來區選大敗，結果早已寫在牆上。
添馬男