彈鋼琴唔一定要喺大會堂演奏廳，就算喺街頭，只要有一座鋼琴、一雙巧手，邊度都可以係音樂會，包括旺角街頭。幾部由本地設計師裝飾嘅鋼琴，噚日放咗喺旺角行人專用區，任何人都可以即席演奏，唔識彈嘅可以做樣影相喺fb打卡，識嘅只要係咁意露兩手，已經技驚四座。
呢個係英國藝術家Luke Jerram策劃嘅街頭文化創意活動Play Me, I'm Yours，7年嚟已經去過全球47個城市大街小巷。識唔識彈都可以走近呢啲放喺公園、巴士站、地鐵站嘅鋼琴。
放喺公共空間嘅鋼琴往往帶嚟驚喜，好似有鋼琴家喺外國機場候機室彈鋼琴，有露宿者喺英國紐卡素中央火車站彈琴，都令人讚嘆不絕。唔知香港又會唔會卧虎藏龍？今日中環PMQ元創方嘅活動開幕禮，會介紹Play Me, I'm Yours香港站未來數月遊走香港路線圖。