現年43歲的鄭中基（Ronald）年少輕狂過，當了爸爸後，他徹底洗底，變成了好爸爸，Ronald將家庭事業友情重新排位，家中一對寶貝是他的首位，拍戲選角、出埠工作都會以子女為先：「我比以前好咗，但都有進步空間。」
撰文：溫敏芝
鄭中基近日拍攝胡耀輝自編自導自演的電影《猛龍特囧》，日前Ronald與胡耀輝在尖沙嘴接受本報訪問，片中有中國好男兒選舉，現實中，Ronald又是否好男人？他靦腆說：「我比以前好咗，但都有進步空間，脾氣同烹飪都要好啲啦，不過𠵱家責任感大咗，以前我未有小朋友，約君如（吳君如）、古仔（古天樂）出去，都會話君如咪掛住湊女，飲杯嘢都咁難，𠵱家變咗我哋係咁講細路仔嘢。」問到會否介紹女仔給單身的古仔？Ronald笑說：「我唔做呢啲事，如果最後唔夾咁點，唔好傷感情。」
抗拒全裸演出
Ronald坦言現時拍戲、選角方面都會考慮自己爸爸的形象，他說：「好似變態角色就唔好喇，出埠做嘢最好個幾禮拜，試過去咗三個月拍戲，返嚟變到好陌生，個樣又唔同晒，好似舊年父親節我去唔到個女學校嘅親子活動，都會內疚，今年我去番，見到有啲同學爸爸唔得閒嚟，小朋友眼濕濕，我都會眼濕濕。」Ronald現時無論返家有多累都會與子女玩，以前拍戲鍾意下午開工，現在就鍾意早更，夜晚可以返家吃飯。已有一子一女的Ronald會否再生？他說：「畀太太唞下先，但生多個都OK嘅。」
說回電影，Ronald今次在戲中與胡耀輝飾演識於微時的兄弟，但曾經反目，因為一單案件，Ronald以卧底身份再遇這位兄弟，充滿兄弟情，胡耀輝說：「原本我冇諗住做，但佢話我演佢先拍喎。」戲中胡耀輝老婆張暖雅有參演一角，更有一場親嘴戲，胡耀輝表示不會介意。片中，找來尹光、蘇民峰等客串，有一場戲Ronald要咬碎假藥，然後吐入昏迷了的胡耀輝口中，Ronald說：「真係堅𦧲落去，我都有壓力㗎，驚𦧲歪咗。」他又說現時拍戲都有底線，會抗拒全裸演出。
服裝提供：BEAMS（鄭中基）
髮型：Horace Tse@QUEEN'S PRIVATE i SALON（鄭中基）、JJ@CAPELLI（胡耀輝）
化裝：Mon Chun（鄭中基）、Aster Phang（胡耀輝）
場地提供：Hotel Icon
