耀才證券（1428）老闆葉茂林認真好嘢，上月初股災，佢喺低位撈入耀才股票，轉頭喺月尾沽出即賺800萬元；上星期人仔忽然貶值，葉老闆又話佢冇持有人仔，好似輸錢總係冇佢份！
耀才噚日又請客戶睇戲，葉老闆可能頻頻賺錢，心情勁靚又風騷，講到人仔，仲即刻專家上身，話「我估一兩年內，起碼跌10%，加埋先前嗰啲（跌幅）」，佢建議投資者短期都係將手持人仔轉番做美金。
佢今年初賣走阿仔Magnum（2080），被問到仲有冇嘢會賣，佢就繼續講笑咁話「𠵱家得番個女（耀才）18歲，咁靚，唔捨得賣，除非遇到四叔喇」。
其實葉老闆咁風騷都有道理嘅，噚日呢個活動，一班耀才財經台嘅靚女又打扮得靚靚出動撐場，葉老闆成日被靚女圍住，實笑晒喇。
為免被班靚女搶晒鏡，耀才「大隻佬股評人」郭思治就着番件交叉綁帶白色襯衫出現，件衫有少少透視到佢古銅色嘅肌肉，佢仲問人「睇唔睇得出好大隻？」認真貪靚！