最大嘅「羅生門」唔係邊個至係呢位女神嘅真身，而係點先可以成為一個值得男人死心塌地等你十年嘅女神。「女神」嘅定義唔只靚，唔只得B餐、樣靚身材正嘅「高登女神」人妻Kay，仲有靠體貼男友出名嘅「麥記女神」Mitena Cho（米曹），堅持信念、勇於表達意見嘅「樂壇民主女神」何韻詩，同埋極度貪玩、唔怕試新嘢嘅「百變女神」夏蕙bb......。喺絲打們心目中，女神原來有另類特質。
咪以為香港女仔個個好有自信，早前一個網上投票結果發現，只有兩成女仔充滿自信，認為自己天生就係女神。超過四成女仔就唔講外表，覺得自己嘅美來自有性格，加埋有個人特質，就足以登上女神寶座，反映絲打們更注重個人修養同內涵，認為內在美勝過外在美。
但調查同時反映絲打們對自己外表冇自信。兩成五人認為要化妝後先可以變身女神，更有一成二人冇信心到插水，認為自己需要整容。即係話，總共有接近四成女仔對自己外表耿耿於懷，冇晒自信。
外表可以靠化妝、打扮，但係內在美就唔係戴個大眼仔就可以改變。反而最重要係明白內在美嘅吸引之處，識得點樣欣賞自己，先可以由內而外咁靚出嚟。事實上，唔一定要做靚爆鏡女神，每個女仔都有佢嘅氣質，各有光芒。重點係勇於追求真我，散發自己嘅獨特氣質，再加上適度嘅肌膚保養同打扮，要成為充滿光芒嘅女神，其實唔難！