特首梁振英呢段時間最重視，當然係佢嘅心肝寶貝創新及科技局啦，君不見佢不停借創科局成立無期鬧泛民拉布，又頻頻發送訊息話科技產業好有用㗎，既促進經濟發展，又助青年向上流，但喺CY對創新科技產業雄心壯志之時，向來同佢嘴形唔多啱嘅財爺曾俊華，卻一盆冷水淋CY，強調科技產業「如果只是『人做我做』，當然最終是失敗居多」。
「決策者要分辨能與不能」
鬍鬚曾噚日喺網誌發表題為〈分辨能與不能的智慧〉文章，先引述美國神學家和政治哲學家Reinhold Niebuhr嘅著名禱文，指分辨能與不能嘅智慧最為重要，「否則我們很可能會盲從現實、坐失良機，或者枉費心機、虛耗時間」。
繼而佢就話嘞，呢種道理不單止係做人處事座右銘，對企業管理、經濟建設都有啟發作用。鬍鬚曾直指，有商界人士質疑香港係咪能夠藉住一帶一路，發展諸如創新科技等新興產業，強調關鍵嘅係創業者、投資者以致「決策者」，「有否分辨能與不能的智慧」，最醒神一句莫過於：「如果只是『人做我做』，當然最終是失敗居多」。
咦，就喺上個星期日，官媒新華社訪問CY時，CY就提到要成立專門機構研究如何推動一帶一路，包括遴選合適發展的產業，而創新科技經常被佢掛在口邊，可能鬍鬚曾預視到盲目發展，只會失敗告終，特別嚟個當頭棒喝，唔使成個政府一鑊熟。
有口痕友笑稱，如果梁班子耗盡心力搞創新科技、最後卻只得一如聞西發明嘅「攞你命三千」，唔慌唔攞大家條命咯。
李八方
mailto:[email protected]