NBA仲有兩個幾月先開季，一班球星梗係四出琜銀啦！新季轉投拓荒者嘅後衞米克米拿（Mike Miller）噚日來港，準備聽日喺灣仔修頓出席表演賽，藉此宣傳自己創立嘅能量飲品品牌；佢嘅生意拍檔「巨無霸」奧尼爾（Shaquille O'Neal）今日都會到港，踩入蘭桂坊打碟做DJ。
米克米拿噚日拖住老婆到埗，表現親民到爆，面對等咗個幾鐘嘅球迷，簽名、合照全部來者不拒；有旅客見到呢位逾兩米高嘅球星，衝埋嚟合照都冇嚇親佢，米拿仲笑住同女fans影相。嚟緊會喺甲二球隊跟操嘅印度籍籃球小子Sunny，更加拎部iPhone出嚟畀偶像簽名（小圖），搞到全場嘩聲四起。
米克米拿今次訪港，係為咗宣傳自己創立嘅能量飲品品牌，希望藉此打入中國市場。合夥人之一奧尼爾就喺今晨抵港，會合米拿後搵埋藝人方力申暢遊澳門；而奧尼爾返港後就去蘭桂坊打碟過DJ癮（見附表）。至於二人訪港嘅重頭戲，當然係打波啦；禮拜二夜晚七點，佢哋會踩入灣仔修頓，同陳兆榮、李琪、徐遠成等甲一球星打表演賽。想入場就要登上 http://lifeenergy.com.hk ，睇下點樣換飛喇！
