民主黨單仲偕前排申報，會擔任博愛醫院2015至2016年度嘅名譽顧問。睇番博愛醫院幾十人嘅名譽顧問名單，隨便搵已經見到立法會主席曾鈺成、民建聯譚耀宗、葉國謙、鄉議局副主席張學明、林偉強個名，十居其九都係建制派人士，單仲偕幾乎係唯一一位泛民中人。咁點解佢會獲任做名譽顧問呢？莫非因為佢係溫和派而獲青睞？
單仲偕話，實情佢好多年前已經有做博愛醫院名譽顧問，記憶中由佢做葵青區議員開始已經有做，但就中間斷斷續續咁囉，好似2008至2012年嗰時冇做立法會議員至冇做。當初之所以會做，就係因為佢係喺博愛醫院出世㗎！唔怪得之啦，原來單仲偕就係博愛醫院嘅生招牌。佢仲話其實做呢啲顧問冇乜嘢要做，頂多幫吓手籌款咁囉。