天津大爆炸後，A股上海本地股連日狂升，表面原因，係上海自貿區龍頭股外高橋集團傳要整體上市。但有內地投資界人士分析，真正原因係，天津自貿區係上海自貿區最大競爭對手，而家出事，起碼要衰幾年，上海股成為最受惠對象。
大爆炸喺濱海新區發生，屬於天津自貿區核心地帶，是近年內地經濟的黑馬，增長速度大幅跑贏上海。但表面光鮮的數字，實質管理水平連全球最落後地區都不如，一下老底都被揭穿。相比之下，上海已經算好好多。
至於香港，筆者就未許樂觀。我們的特首，測量師出身，曾任天津市顧問多年，對當地規劃亂象視而不見，還號召香港，要向天津學習土地利用方式。天津爆炸的肇事公司來頭猛料，可以肆無忌憚將一個超級火藥庫建喺民居之中，而絲毫不受監管，正是人治淩駕法治的典範。如果香港仲不斷行政干預，將來跑輸上海，甚至衰過天津一點不出奇。
黃尹華