新一屆葡萄牙超級聯賽上周五晚開鑼，傳統勁旅士砵亭（圖）就喺甚為艱苦嘅情況下取得開門紅，憑住艾迪恩施華喺補時八分鐘嘅12碼絕殺唐迪拉，為周中對莫斯科中央陸軍嘅歐聯附打下強心針。士砵亭今季改由名帥捷西斯領軍，加上有意甲名將阿古蘭尼加盟，再配合舊將如2015年歐青賽最佳球員威廉卡維奴等，雖然第一場贏得辛苦啲，但相信佢哋今季絕對有力挑戰賓菲加同波圖等勁旅。