效力甲一晉龍嘅23歲射手「阿蘇」蘇尚瀛，噚日喺赤柱航海學校上演嘅Red Bull King of the Rock 1-on-1比賽，由64強一路過關斬將，最終喺決賽射入四球三分波，以18:16險勝晉龍隊友司徒偉傑；而效力女甲福建嘅「腳趾」郭芷菁，則喺Queen of the Rock決賽，以12:11絕殺均安嘅陳偉萍封后。阿蘇、腳趾同去屆全球賽亞軍嘅卓婷，將會喺今個月26號出發去土耳其，備戰29號喺當地上演嘅全球賽，同世界各地嘅好手爭做單挑王、后地位！
就讀理大嘅阿蘇賽後話︰「其實我決賽最想對司徒偉傑嘅四強對手陳榮偉，因為我上年就係俾佢淘汰，好想再對佢報仇。不過，今年最終勝出都好開心，希望可以喺香港以外嘅地方打波見識吓。接住嚟嘅時間會加緊練跑同做gym，增強體能。」