兩台齊播德國波，有咩咁值得happy？有，得一個解碼器嘅球迷唔使怕冇波睇囉。其實唔止，一齊播同一場波，吸引力就要靠其他元素分高低嘞，因為咁我哋多咗場波睇，叫做電視台大戰。
唔使擔心，呢款大戰唔會見血亦冇仇口，而係一種行家久違嘅良性競爭，睇邊個唔再係因為慣性收視，亦唔係因為得你獨家，揀邊個嘅權利交番畀消費者。少年時代，睇8、90年代嘅世界盃，其中一個亮點就係兩台大鬥法，鬥多嘉賓、鬥多獎品，娛樂為主定專業為上，各為其主、各施各法，鬥餐死之下益咗邊個，當然係觀眾。
收費頻道時代來臨原本係球迷之福，乜波都有得睇，但亦同時接受咗獨家才是王道。收費台主張獨家霸權，因為咁先上到客，咁先有機會做低對手。但與此同時，業界就由鬥製作變咗鬥版權費，直接得益者由香港觀眾變咗外國片商，版權費越升，製作費越跌。
今時今日好多人寧願上網搵link睇非法波，原因一係慳錢，原因二係冇分別，上網睇冇分別？因為獨家，畀乜你都要睇，賽前賽後冇心機，講波個個差不多，差不多？係，有人話聽廣東話同俄文都冇乜所謂喎，對手仲未死得，用家就不斷流失。
電視台買咗波返嚟播，係度身包裝定有乜播乜？開廠定直出vo？賽前賽後用罐頭節目定自家製品？係左手交右手嘅電影台方式，定係吸收再消化嘅新聞台做法？呢啲決定都係長遠有冇friend做嘅關鍵。
兩台同播德國波事件最好唔係個別事件，電視台之間嘅良性競爭希望可以陸續有來，因為我哋雖然鐘意睇外國波，但亦想香港傳媒都可以踢場好波。
KEYMAN
節目主持