新一季NBA仲有兩個幾月開鑼，但湖人就搶盡風頭，皆因盛傳今季會係球隊傳奇拜恩（Kobe Bryant）嘅告別球季；另外仲要多得兩位「闖禍」新仔。
讚麥基迪當方丈冇到
今年選秀大會俾湖人揀中嘅大前鋒蘭斯（Larry Nance Jr.），幾年前喺社交網站寸過拜恩係強姦犯；山水有相逢，咁蹺做咗隊友，傳媒就將件事摷番出嚟講，最後兩位透過短訊溝通先至成功和解。
過咗一排，估唔到嚟緊將會同拜恩合組老嫩後場組合嘅榜眼控衞D羅素（D'Angelo Russell），又喺同一個社交網站對前輩不敬。話說羅素仔早幾日出post話曾經效力速龍同火箭等球隊、前年退役嘅得分王麥基迪（Tracy McGrady）係「GOAT（Greatest of All Time、歷來最佳）」──咁叫比T-Mac早一年出道、下周日37歲生日都仲打緊嘅拜恩情何以堪呢？拜恩用咗個瞌眼瞓嘅表情符號嚟回應，羅素仔知道自己闖禍就即刻認錯；好在拜恩話佢只係講笑，仲話期待今季佢哋兩兄弟拍住上，一齊為湖人創造歷史。
前輩支持，羅素仔真係要好好珍惜，因為大家都預計拜恩打埋呢季就會榮休。而佢本人最近亦放風想打下年里約奧運，疑似想用一面奧運金牌為佢20季球員生涯畫上圓滿句號。不過，一向有骨氣兼有自信嘅佢，講明唔會打人情牌，話要靠好表現名正言順入選國家隊喎。