正所謂創業難，守業更難，一齣戲要成功唔難，續集都Keep得到先至高難度。剛出藍光碟嘅《狂野時速7》，鍾意跑車嘅龍叔叔由第一集已追開，雖然水準時高時低，但每集總有噱頭引到你買飛入場。今集依然有勁多賣點，而且動作場面設計相當出色，已經由第一集嘅MK仔鬥四分之一里直線加速，進化成《職業特工隊》咁嘅警匪片，唔好理成班主角係咪都有不死身，總之打得燦爛、撞得刺激就夠喇。外國影評話今集係最好睇嘅一集，票房仲驚人，單單中國大陸已勁收接近20億人民幣，搞到張藝謀都要走出嚟，話要團結抵抗荷李活咁話。
影碟市場都靜咗好耐，據灣仔碟舖老闆昌哥講，終於有隻碟可以Call番晒班熟客蒲頭。仲話洲立呢水碟出得好，除咗一般膠盒版藍光外，仲有兩款鐵盒版，一個係車側做封面，另一個就係保羅獲加深情望住光頭佬雲迪素，黑白色調，根本就係向已逝世嘅保羅作致敬。昌哥仲話識揀一定買保羅封面，車側嗰款只係Fans買埋做收藏，好少人會單買而揀車側封面，搞到舖頭唔夠保羅封面賣，另一個封面就積咗喺度。
今集最大話題，當然係男主角保羅獲加拍攝途中，因車禍而離世。睇咗咁多集，對佢多少有感情，今集算係佢嘅遺作，可能出於珍惜之情，一路睇個心就一路戚戚然。導演搵咗保羅個細佬Caleb Walker頂替，留番一臉唏噓嘅鬚根，又真係幾似大佬。成套戲龍叔叔金睛火眼贒到實，都唔係好分到邊場戲係細佬演出，製作公司話動用到CG合成喎，嘩，乜現今科技進步成咁，遲啲會唔會就咁笠個「臉堅尼」落頭，就要咩星有咩星？
講番套戲，差不多原班人馬上陣，熟口熟臉有親切感，雖然大隻Rock近乎客串演出，無咩戲份，不過開頭一場打鬥戲，已經扣緊觀眾情緒。跟手又鬥直路加速、汽車空降、迎頭對撼，同Tony Jaa對打等，全套戲都暴力到不行。結局講保羅揸車追上雲迪素講拜拜，跟住喺分叉路口分道揚鏕，背景再襯番首《See You Again》，男人再麻甩，都忍唔住眼濕濕。龍叔叔入隻碟落機，唔係急住睇套戲，而係揀咗特別收錄嘅《See You Again》MV，Loop咗三次先睇套戲。一剛一柔、一文一武都捉晒觀眾個心，抵你打入史上最高票房第五位喇。
藍光碟收錄超過一小時Bonus
人多靚車多一向係《狂》系列特色，今集大壞蛋Jason Statham都算有台型，出場揸嘅車由積架F Type到瑪莎拉蒂都有，甚有品味，加上中東神級超跑Lykan HyperSport首度登場，未計稅都二千幾萬港紙，仲會飛越兩幢高樓大廈，剌激指數爆晒燈，車迷應該會睇得幾開心。不過荷李活片都係離唔開大美國主義，龍叔叔都慣晒，只係見到主角揸嘅野馬好似變形金剛咁神勇，仲識甩尾鍊贏架尾轆車，又話Audi R8會爆偈撐唔到200米等等，講到架架車都唔夠佢鍊咁，識車嘅會笑咗出嚟。
影音方面，由於用LCD大電視睇，唔似戲院咁用投影機播放，金屬效果相當出，一堆反晒光嘅靚車，又係睇到龍叔叔心癢癢，電影同影碟都無3D版本，係有啲可惜。音效方面唔使多講，集集都係加重引擎同汽喉嘅聲浪，炸起機上嚟，真係好似有架超跑喺你隔籬狂踩油咁，震到入心。要讚係Bonus部份，超過一粒鐘內容，由特技場面解構到導演評述都有。
編輯：李寶筠
美術：楊永昌
龍叔叔
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。（ http://www.facebook.com/uncle.dragon.movie ）
