早幾日立法會主席曾鈺成自嘲，相信特首梁振英會覺得佢一直容許泛民拉布，係最差嘅立法會主席。工聯會陳婉嫻嫻EE噚日就借呢件事寫文，一鋪過唔點名寸盡政界，當中點少得梁振英呢。
暗踩田少得勢不饒人
嫻姐開宗明義話識自嘲嘅人更加有政治魅力，好似有人自嘲係孤獨嘅推銷員、有人放隻宜家公仔喺枱，擺明講緊前特首曾蔭權同梁振英。不過佢覺得擺公仔嗰個人「略嫌留有一手未夠盡情」囉。而且自嘲「豬咁蠢」好過笑人哋豬一樣，因為前者落落大方、後者得勢不饒人，「氣量高下立見」，暗踩自由黨田北俊！
跟住嫻姐分析，今時今日「沒有最差、只有更差」，所以嗰啲「自認最差」嘅人，就令大家反思乜嘢係最差，因而「自認最差」即係話「我比別人好」。嫻姐再批評嗰啲「有白宮發言人『上身』一樣」嘅人，肆意批評其他人係「低手」做法，仲叫呢啲人與其鬧人不如鬧自己。總之識得由「自嘲」變成「自省」，相對凡事「擺硬軚」嘅人優勝得多。薑係越老越辣嘅，唔知幾時嫻姐幾時會「自嘲」一番呢？