謝賢（四哥）、曾江、胡楓和Joe Junior四人加埋超過300歲，早前還開開心心出發到俄羅斯拍攝無綫節目《4個小生去旅行》，可是大前日記者會後突然吵大鑊，四哥出手怒摑曾江，當時夾中間的修哥被撞到飛甩眼鏡。
「仲聯絡佢，多餘嘅」
四哥昨午4時許，單拖坐保母車到山頂行山，尾隨有約十名記者追訪，四哥最初心情大靚，健步如飛，當有記者提起前新抱張栢芝粉絲抨擊四哥沒有出席乖孫Lucas的生日會，四哥火滾說：「唔好嘈，乜問啲咁嘅嘢。」四哥透露發燒的Quintus已出院。問到四哥有聯絡曾江嗎？四哥說：「黐線，仲聯絡佢，問嚟都多餘。」沿途有巿民認出四哥，並上前握手支持，四哥也不介意無綫抽水宣傳，他說：「唔嬲，你見我嬲人未？我呢世都未打過交。」四哥也否認夾宣傳。
記者其後再致電四哥，他再爆拍攝《4個小生去旅行》驚險事，本報在四哥出發前曾踢爆他做了通波仔手術，當時他否認，但昨又承認：「醫生（香港）都話好危險，我話最多咪死，結果喺當地太空人離心訓練前必要做心臟檢查，報告係very good，現場玩有醫生睇住。」宣傳片顯示有些活動有危險性，四哥笑言：「我係硬骨頭。」有指四哥後日請該節目台前幕後食飯睇直播，曾江都預料沒有份兒，四哥說：「取消咗，幕後話剪唔切片，遲啲先食。」
不屑指曾江扮嘢
曾江外景時聲稱腳痛要坐輪椅，但前晚與太太焦姣約友食pizza時卻行動自如，四哥不屑：「佢喺度扮嘢，佢要特別嘛。」曾江表示撞見四哥時「揸手」泯恩仇，四哥仍勞氣：「鬼睬佢，呢啲咁嘅人唔使理佢，實在太乞人憎。」四哥和曾江的恩怨情仇估計有助谷收視，若收視理想，fit爆四哥會着泳褲晒身材嗎？他豪氣說：「點解着泳褲？除晒啦，儍嘅。」但事後四哥又反口，他表示非無綫合約藝人，懶理收視。
此外，四哥發火打曾江，有網民質疑是宣傳伎倆，無綫一方面否認「夾計」，但同時在《東張西望》和《超強選擇1分鐘》等都玩抽水，令事件更撲朔迷離。
採訪、攝影：陳杰、徐錦池、吳耀輝
