皮膚白滑身材高䠷的陳慧琳（Kelly），好難想像她已經是兩子之母的42歲師奶，好難想像她已經入行20年，當大部份港女都想嫁個有錢人，可以叠埋心水做少奶奶的Kelly，卻覺得日日在家湊仔好鬼悶，希望可以再做20年；不怕有皺紋只擔心老了眼皮下垂的她，坦言老公事先張揚反對她整容，笑說：「我都叫佢一定要stop我！」
撰文：余燕儀
眨眼間陳慧琳已經入行20年，歲月催人老這句說話，卻完全不適合用在她的身上，外表不似4張幾的師奶，得天獨厚到令人妒忌，Kelly說：「我都想，就嚟43（歲）啦，樣唔驚老，老係好正常，反而驚病痛啫。不過如果老咗眼皮垂落嚟，要黐膠紙好煩。」貪靚的她老了會否拉面皮？Kelly肯定說：「梗唔會，老公話一定阻止我，我都叫佢一定要stop我，我只係諗過眼皮問題，老咗會唔會有需要整，但唔會去拉啲啲後生啲啲，因為我好驚做手術，生仔開刀時好痛。」
享受家庭生活
在圈中20年，Kelly覺得自己得多過失：「名同利唔使講，仲有自信心同多人愛錫，希望有再多20年喺呢個圈，有人再睇我，但到時60幾歲啦！自己冇諗退休，𠵱家有體力魄力仲做到，只係唔知將來會唔會有乜怪病，因為身體一向唔係好強，好易傷風感冒，自己唔係驚老咗唔靚，只擔心到時骨骼疏鬆，有心無力，想唔退休都唔得！到時一定悶死，唔知係咪慣咗咁忙，冇嘢做覺得悶，陀仔放咗幾年假，日日搵街去搵嘢做，𠵱家開完工返屋企雖然好攰，但感覺好滿足。」
有得必有失，Kelly失去了甚麼呢？她說：「好似失去咗一啲安定落嚟時間，乜都好急趕，唞唔到氣，好易神經緊張，因為全部人等你，自己畀自己壓力。」問老公是否支持她繼續工作？Kelly坦言：「佢都問我做到幾多歲？老咗係咪繼續跳舞？我唔想畀時間表自己，今日唔知明日事，將來我退休一定煩死佢，成日問住佢幾時返嚟食飯，哈哈！」一家四口家庭生活好開心？她說：「𠵱家好好，好愉快，同老公感情良好，間唔中好溫馨，間中咀嘴佢。」
自從Kelly做了人妻和人母後，這幾年在事業上似乎靜了下來，她坦言：「冇法，身份唔同咗，唔可以兼顧咁多，市場又唔好，唔係成日出碟，觀眾冇捨棄我算係咁，生仔都睇喎，我唔使日日企喺高峯，太多嘢做唞唔到氣，以前一星期飛3次日本做嘢，搞到去旅行都唔揀日本。」
後悔病住登台
對於近年唱片市道低落，越來越少人買唱片，Kelly嘆謂：「好灰！冇人買碟冇人整歌冇人才，好多唱片公司都怕咗，出少啲碟，好在我仲可以做其他嘢，拍吓戲做活動，仲有其他出路，只係唱歌真係陰功！多謝大家多年來支持，冇你哋就冇今日嘅我，多謝你哋仲記得我！」
多年來絕少埋堆的Kelly，在圈中有否交到真正朋友？她說：「雷頌德，喺呢個圈唔敢乜都講畀人聽，但同佢乜都夠膽講。」有否試過得罪人？她說：「有，自己人情世故方面好渣，說話言談之間傷害到佢，無心之失，某些人好敏感，可能唔啱聽，經一事長一智。」有沒有後悔的事？她說：「有，後悔當年感冒菌入腸病到死吓死吓，仲應承去溫哥華做騷，好似活死人，結果瘦咗十幾磅。」
服裝：Valentino
髮型：George Shum of Alchemy
【大事件】天后地位無可替代
陳慧琳（Kelly）出道20年，由《一切很美只因有你》開始，已奠定其樂壇天后的地位。
1995年
與郭富城合演電影《仙樂飄飄》，推出首張原聲大碟，主打歌《一切很美只因有你》連奪電台兩星期冠軍歌，成為當年的新人王
1997年
兩度於紅館舉行個人演唱會，是當時出道以來最快在紅館舉行演唱會的歌手
1999年
進軍日本，與深田恭子合作演出日劇《鬼之棲家》
1999年
首奪勁歌金曲最受歡迎女歌星獎
2002年
榮獲2002年度「香港十大傑出青年」，成為最年輕的演藝界得獎人士。同年再獲「杜莎夫人蠟像館」度身製造蠟像
2004年
成為全球首位獲得Parfums Christian Dior及Dior Couture Asia Pacific聯合贊助的藝人，並前往巴黎拍攝該品牌星級護膚品系列廣告
2004年
獲選「2004年度世界傑出青年」，是首位香港女藝人獲此殊榮，成為「雙料傑青天后」
2008年
擔任「2008北京奧運香港聖火接力傳遞」火炬手，編號007，為第七棒奧運火炬手
2008年
於「陳慧琳Love Fighters演唱會」宣佈與劉建浩結婚，哄動娛樂圈
2009年
被世界經濟論壇選為全球青年領袖。同年誕下長子劉昇
2011年
宣佈以人工受孕方式再度懐孕，可惜不幸小產
2012年
誕下次子劉琛