特區政府環境局就兩電利潤管制一事做兩次諮詢，第一次係問市民選擇（A）增加向內地買電，還是（B）全倚賴本地發電。政府當時話冇立場，但同時黃局長周街講向內地買電有好處。諮詢結果就係絕大部份香港市民拒絕A餐，選擇B餐。
第二次諮詢又係問卷調查式，問市民對准許回報應該係幾多（開出6%至8%，低於現時嘅9.99%），引入競爭，用多啲天然氣發電等等。呢個諮詢已在六月尾完畢，現時未知結果，但兩次諮詢都顯示咗政府假借「態度開放」之名，冇承諾或不考慮有任何既定政策，只係一味問意見，顯示當局毫無領導能力或無意願訂定政策，避免市民反對，一味話聽民意喎，政制改革又唔見政府聽民意？扮吓民主而已！
真正民主嘅美國搞到翻天覆地嘅氣候轉變政策，反為一啲都唔駛諮詢人民意見。奧巴馬總統在八月三日宣佈一個Clean Power Plan（清潔能源計劃）根本就係單方面行政主導嘅大政策，挑戰共和黨控制嘅國會，你敢唔敢否決？此計劃事先冇出份諮詢報告，亦無問過共和黨議員，一宣佈就打真軍，睇得出白宮有決心，有魄力，有決策來應付氣候轉變，明確訂下美國能源電力之發展方向，不惜電費會增加，邊度駛用問卷問美國人民㗎！
簡單啲講，奧巴馬政府要（一）按2015年水平，2030年嘅美國整體碳排放要削減32%，比以前嘅削排目標增加9%；（二）每個州有自己嘅削排目標，由環境保護局（EPA）訂目標並監察；（三）到了2030年，美國的電力供應，以發電來源計，要達成如此組合：煤電27.4%（36.9），天然氣32.9%（30.9），核子18.9%（18.9），再生能源20.1%（12.4），其他0.7%（0.9），以上皆為百分比，括弧內為2013年數字。比較2030與2013的分別，奧巴馬就是要大力削減煤電比率，大增再生能源發電（如風、水力、太陽能），微增天然氣發電，核子電力維持不變。換言之，15年之內，美國煤炭發電量須要萎縮，新發電站由再生能源代替。如此一來，美國的煤炭州分如西維珍尼亞、肯特基、印地安納等十多個州的經濟將大受影響，15個州的檢察官立即聯手發表聲明反對奧巴馬計劃，不惜大打官司，是故奧巴馬的大計能否如期推出，尚未可料，又假如明年共和黨贏了2016大選，一切免談。明年的美國總統大選，將關乎國際合力對抗氣候轉變的前景！