李逸朗（Don）由內地回流返香港發展，人氣升但是非卻停不了，先後被指借特首女兒梁齊昕和緋聞女友朱晨麗做宣傳。最近Don又遭舊拍檔蔣雅文（Mandy）數落，指有人藉機抽水，Don多次澄清，並在facebook留言：「請各位媒體朋友別再為這件事打電話給我作採訪，因為我不會再回應更多了，多謝。」
不過Don始終忍不住，昨日與楊子瑤、EO2成員彭懷安（Eddie）等在尖沙嘴出席電影《男極探射燈》煞科宴，Don又再解釋：「我冇抽水，如果要抽就搵大陸拍緊戲嘅朋友，大家睇嘢方法同方向都唔同。其實好小事，冇乜嘢要交代，覺得好好笑，可能娛樂圈冇乜新聞啦。」
楊子瑤收黃榕電話
Don還自爆曾致電Mandy澄清，問他合照相怎會變成「七年之約」？他解釋：「講番七年前我哋離開公司，佢去台灣發展，我去大陸，大家都叫對方畀心機做，唔可以喺三、四線浮游，要對人生有個交代，大家互相鼓勵，所以返嚟有時間就去睇吓佢，只係幾分鐘嘅事。」他強調與Mandy從未承認過拍拖，還將個波拋畀公眾謂：「一路都冇承認過，有否認過，只係大家好似掩住眼冇睇過，我哋只係工作上朋友，係公司安排，大家自我麻醉跳channel睇我都好無奈。」
另外，楊子瑤最近亦因女主角之名與黃榕爭拗，黃榕日前在活動上淚灑當場，子瑤說：「佢有打過電話畀我，唔係道歉，講咗差唔多30秒就收線，解釋番件事，我諗佢應該冇心嘅。」至於Eddie透露右手骨折已經差不多完全康復，只有些微未消腫，他透露休養期間朱慧敏有煲湯給他，問是否成功翻撻？他緊張說：「都冇講過分手，我哋係有溝通，感情一向都好。」
採訪：王連連
攝影：陳順禎
