大家仲記得唔記得「2017，一定要得」？之前政府一直唔肯披露宣傳政改方案用咗幾多公帑，公民黨毛孟靜鍥而不捨，問唔到政制局就向申訴專員投訴，搞咗兩個月，政制局終於肯交條數。
原來成個「2017，一定要得」用咗成500萬宣傳，當中最貴嘅梗係巴士同港鐵廣告，呢度已經花咗300萬元，其次就係整條電視宣傳片同埋電台宣傳聲帶，咁又使咗80幾萬蚊。條宣傳片好勁㗎，由4月22日至6月18號表決日，喺5間電視台播咗5,200幾次，總時間係2,619分鐘，換言之不停咁睇的話，睇足過百日先睇得完。毛姨姨就鬧爆，計埋呢筆500幾萬公帑，前前後後成場大龍鳳使咗近2,500萬元，換嚟都係8票贊成，真係浪費公帑！八方計一計，即係平均每票要成312.5萬？