導演落重bromance，勾引良家婦女的腐味，證據確鑿，不容抵賴。人來，同我買多兩張飛畀姊妹們去睇。《特務型戰》導演Guy Ritchie前作《神探福爾摩斯》hehe味濃，今次再接再厲。直筆甩，零攣味的雙雄，初段鬥生鬥死，然後恨中有愛（腐女表示冇咁恨就等於愛），太幸福了。
電影改編自半世紀前一齣英國同名人氣特務電視劇《玉面金剛》。當年迷倒不少電視精。麗的電視播放此劇集時，CCTVB都未開台。故事背景是冷戰時期，國際犯罪集團勾結前納粹黨人，製造原子彈「炮製」第三次世界大戰。美國CIA特務與蘇聯KGB特工有世紀式聯手阻止計劃是戲味所在。導演放大荒謬，狂灑幽默。兩人狗咬狗骨，互窒、猜忌，火花燒得勁旺。兩位主角，一個是新版超人Henry Cavill，另一個是與Johnny Depp一齊演過《獨行俠》的 Armie Hammer，名氣普通。不過兩個靚仔的三件頭西裝和型褸賊仔帽造型，絕對是男神級數，讓女觀眾理智盡失，正是生面口才有如斯驚喜。據知美國特工角色曾屬意Tom Cruise去演，不過他要接拍MI5，我幾乎劏雞還神。
60年代的時代背景，令電影特技樸實，打交好、飛車好、片船好、槍戰好，沒有炫技，沒有天花亂墜，只賣實感。兩人特務式深入敵方陣地，鬥快鬥裝備，輸有時，贏有時，精采笑點爆完又爆。CIA明明可以從容嘆住美酒鬆人，卻拚死救KGB，這就是愛！過程不忘型棍，引人入戲院尖叫，點先？其實女主角一樣深得觀眾心。對，電影有女角的，她飾演一名失蹤德國科學家的女兒，是兩男滲進犯罪集團的關鍵。KGB對她異常深情，又是加分位。
後段節奏時快時慢，部份情節完得突兀，睇到有點迷失。好彩最後打大佬過程爽快冇甩轆，實在可喜可賀。任務完成，兩人幾乎都想置對方於死地之際，溫暖人心的hehe情節再度出現，導演果然不負'king of bromance'之美名。電影擺明有下集，伏線話他們仨會到土耳其，我看到畫面閃過土耳其浴，Guy Ritchie真係好鬼識賺腐女錢。
《特務型戰》The Man from U.N.C.L.E.
導演：基里奇
演員：亨利卡維、艾米漢默、伊麗莎白迪碧琪
現已上映
評分：84分
記者：葉青霞
編輯：李寶筠
美術：黃創泰