食酸梅乾變超人，食蕉可以變林峯？現年60歲的吳剛師傅早年進軍飲食業後鮮有復出拍戲，直至去年11月出山為張致恆與許靖韻翻唱的《相逢何必曾相識》拍MV。事隔9個月，吳剛昨現身尖沙嘴旗下食肆煌苑打點時，身形竟比之前瘦了一個碼，驟眼看去竟跟林峯有幾分相似，原來吳剛近日食蕉減肥，瘦到變成林峯！
「真係肚餓就食蕉」
記者昨見吳剛在食肆被客人拉住傾偈和集郵，問吳剛是否減肥瘦身？他直認說：「潮流興fit吖嘛，唔興一嚿嚿。最近得個營養師教我用一個好特別方法，就係唔好食澱粉質嘅嘢，原來真係有效，最緊要過咗下晝5點之後唔好食飯麵，如果過咗5點真係肚餓就食蕉，一樣有energy，人又fit。我原本165磅，𠵱家155磅，條腰以前34吋，𠵱家30吋，都幾好啦！」說罷轉身展示自己滿意身段。記者指他貌似林峯，吳剛笑說：「吓！點解個個都咁講？你唔係第一個講，我邊有佢咁靚仔吖！梗係唔似啦，林峯咁靚仔，我想似佢啫。」
當年吳剛在《歡樂滿東華》除衫搽油令觀眾十分懷念，如今瘦身後豈非無緣再見他除衫爆肌風采？吳剛聞言笑謂：「一有適當機會我都會搽油㗎！呢樣嘢要睇吓劇本同有冇誠意！為慈善可以搽油，一個令大家關懷愛心內容，我係可以再搽油。」可有興趣再參與幕前演出？吳剛說：「如果有啱我劇本同角色，我都心癢癢想玩嘅。」至於前年盛傳他捲入金錢糾紛，吳剛聲稱「一切冇問題」。
採訪、攝影：魯吉
